Toropokgolo ya Tshwane e tšea sebaka se go kgopela badudi ka moka ba Hammanskraal le ba mafelomabapi gore ba se nwe meetse a go tšwa dipompong morago ga gore go phulege bolwetši tikologong yeo.
Le ge e le gore meetse ao Toropokgolo e ya abelago tikologo ya Hammanskraal a se a go nwewa, Toropokgolo e abela mafelo a mekhukhung ka meetse a go nwewa ka ditanka tša meetse tše 52 makga a mararo ka beke, gotee le dilori tša meetse tša go lekana 40 makheišeneng a Selete sa 2 tšatši ka tšatši. Se se direlwa go netefatša gore badudi ba nale meetse a go nwa a go bolokega.
Toropokolo nako le nako e dula e dira diteko tša khwalithi ya meetse ao a abelwago badudi ba rena, ka gona, morago ga bolwetši bjo, diteko tše di tseneletšego di tlo dirwa mo matamong le diphaepheng ka moka tša go sepediša meetse.
Go tšeerwe disampolo tša meetse mafelong ao a amegilego le go išwa ditekong ebile dipoelo tša ona di letetšwe ka Laboraro go bona gore sebakwa sa bolwetši bjo ke sefe. Tše dingwe tša diphetelo tše di begilwego di tšwa tikologong ya Moretele, yeo e sa abelwego meetse ke Toropokgolo ya Tshwane.
Bašomedi go tšwa Kgorong ya Maphelo ya Toropokgolo ba tla goroga gapegape lehono mafelong ao a amegilego go tšea disampolo tše dingwe go tšwa ditankeng tša meetse tše di abelago mafelo a mekhukhung ka meetse.
Sehlophatšhomo sa go šetšana le go phulega ga malwetši se gona mafelong ao go bea seemo leihlo le go dira disampolo tša meetse. Badudi ba kgopelwa go leba maokelong a kgauswi ge ba bona goba ba itemogela dika tša bolwetši bjo. Maokelo le ona a ntšhitše mahlo dinameng go hlaganela ka tšhoganyetšo balwetši ba go laetša dika tša bolwetši bjo.
Toropokgolo e sa letetše dipoelo tša kgonthišišo ya diteko go tšwa go Setheo sa Bosetšhaba sa Malwetši a go Fetelana (NICD) go hwetša sebakwa sa bolwetši bjo.
Toropokgolo e rata go hlohleletša badudi ka moka go tšwa mafelong ao a amegilego go hlatswa ka bleach dikhontheina tša bona tše ba di dirišago go kga meetse go tšwa ditankeng tše kgolo, le go bidiša meetse ao a tšwago methopong ye mengwe pele ba ka a nwa. Badudi ba kgopelwa gape gore ba se phethagatše ditiragalo tša sedumedi go swana le dikolobetšo ka dinokeng goba ka gare ga meela ya meetse.