Ḓorobo khulwane ya Tshwane i khou tama u eletshedza vhadzulapo vha ha Hammanskraal na vha vhupo ha tsini uri vha songo nwa maḓi a bommbini nga murahu ha tshiwo tsha dwadze kha vhupo honoho.
Nga mulandu wa uri maḓi ane a khou ṋetshedzwa nga Ḓorobo khulwane kha vhupo ha Hammanskraal ha ngo tea u nwiwa, Ḓorobo khulwane i khou ṋetshedza maḓi o teaho u nwiwa nga u shumisa mathannga maḓi a swikaho 52 kha vhupo ha vhudzulo ha mikhukhuni luraru nga vhege khathihi na maṱhiraka a u hwala maḓi a swikaho 40 kha vhupo ha vhudzulo ho dzudzanyeaho ḓuvha ḽiṅwe na ḽiṅwe kha Dzingu ḽa 2. Hezwi zwi khou itelwa uri vhadzulapo vha kone u wana maḓi a u nwa o kunaho.
Ḓorobo khulwane i dzulela u ita ndingo dza nga ha vhuḓi ha maḓi ane a ṋetshedzwa vhadzulapo vhashu. Nga murahu ha tshiwo itshi tsha dwadze, hu khou ḓo itwa ndingo dzo fhelelaho kha netiweke yoṱhe ya nḓisedzo ya maḓi nga u angaredza.
Ho kuvhanganywa sambula dza maḓi u bva kha vhupo ho kwameaho u itela uri dzi kone u lingwa nahone hu khou lavhelelwa uri mvelelo dza hone, sa izwi dzi dzone dzine dza ḓo ṱalusa tshivhangi tsha tshiwo tsha dwadze iḽi, dzi ḓo wanala nga Ḽavhuraru. Zwiṅwe zwa zwiwo zwe zwa vhigwa, ndi zwine zwa bva kha vhupo ha Moretele, vhune ha vha vhupo vhune ha si ṋetshedzwe maḓi nga Masipala wa Ḓorobo khulwane ya Tshwane.
Vhaofisiri vha bvaho kha Muhasho wa Mutakalo wa Ḓorobo khulwane vha ḓo dovha hafhu vha dalela vhupo ho kwameaho ṋamusi u itela u kuvhanganya dziṅwe sambula hafhu u bva kha mathannga a maḓi ane a ṋetshedza maḓi kha vhupo ha vhudzulo ha mikhukhuni.
Zwigwada zwa u lwa na zwiwo zwa dwadze, na zwone zwi kati, zwi khou ita mushumo wa vhulavhelesi khathihi na u ita ndingo kha maḓi ayo. Vhadzulapo vha khou eletshedzwa uri vha ḓivhonadze henefho kha tshiimiswa tsha zwa mutakalo tshi re tsini navho nga u ṱavhanya arali vha tshi khou ḓiwana vhe na tsumbadwadze. Zwiimiswa zwa mutakalo zwi khou dzula zwo ḓilugisela u ṱhaṱhuvha vhalwadze vhoṱhe vhane vha vha na tsumbadwadze nga u ṱavhanya.
Ḓorobo khulwane i khou dzula yo lindela mvelelo dza ndingo idzi u itela uri i ḓo kona u khwaṱhisedza tshivhangi tsha tshiwo tsha dwadze iḽi u bva kha vha Tshiimiswa tsha Malwadze a Phirela tsha Lushaka.
Ḓorobo khulwane i khou tama u ṱuṱuwedza vhadzulapo vha vhupo ho kwameaho uri vha dzule vha tshi ṱanzwa zwigubu zwavho nga bleach misi yoṱhe hu tshi katelwa na zwiṅwe zwoṱhe zwine vha zwi shumisa u ka ngazwo maḓi u bva kha mathannga ayo a maḓi khathihi na u vhilisa maḓi ayo e vha a ka u bva kha zwiṅwe zwiko zwa maḓi phanḓa ha musi vha tshi nga a nwa. Vhadzulapo vha khou dovha hafhu vha eletshedzwa uri vha songo ita mishumo ya zwa vhurereli u fana na ndovhedzo, ngomu milamboni kana kha milambwana.